Banneux, Notre
Dame. Ang lugar na ito ay matatagpuan sa isang
maliit na distrito ng Louveigne, Belgium.
Ito ay nasa tuktok ng bundok Ardenes na may taas na isang libong talampakan.
Ito ay may layong labinlimang milya mula sa siyudad ng Liege na siyang
kapital ng probinsiya at siya ring sentro ng diocese.
Ang
simbahan ay nasa sentro on Banneux. May
mga malilliit na pamilihan pero maituturing itong isang mahirap na
pamayanan. Sa isang hindi kalayuan ng
simbahan ay nakatira ang isang simpleng pamilya ng mga Beco. Ang lugar na iyon ay tinatawag na “The
Swamp”. Sa harapan ng kanilang bahay ay
may maliit na hardin na kanilang pinagtataniman ng repolyo.
Noong
1933, ang pamilyang Beco ay binubuo ng siyam na miyembro ng pamilya ---ang
mag-asawa at pitong mga anak. Si
Mariette, ang panganay, ay ipinanganak noong Marso 25, 1921. Iyon ay araw ng Biyernes at pista ng Annunciation. Nagkataong ang araw na iyon ay Biyernes
Santo at araw na binibigyang pugay ang Banal na Krus. Pero walang krus sa loob ng bahay ng mga Beco. Madalang o kakaunti lang ang may
pananampalataya sa Diyos sa lugar na iyon.
Ni wala silang relihiyon pero isa si Mariette sa mga maituturing na may
pananampalataya sa Diyos.
Nagpakita ang Mahal na Birhen kay Marietta sa
Walong pagkakataon:
UNANG PAGPAPAKITA
Araw ng
Linggo, Enero 15, 1933, ang lugar nina
Mariette ay punung-puno ng yelo at malakas pa ang hangin. Ang oras ay alas siyete ng gabi. Nakadungaw si Mariette sa bintana ng
kanilang kusina at pinagmamasdan ang kanilang hardin. Hinihintay niya ang kanyang kapatid na si Julien na kaninang
umaga pa umalis kasama ang mga kaibigan.
Habang naghihintay siya ay binabantayan din niya ang kanyang bunsong
kapatid habang natutulog.
Nang bigla, nakakita siya sa
kanilang hardin ng isang babaeng nababalot sa isang nakakasilaw na
liwanag. “Nanay, Nanay” sigaw
niya. “May magandang babae sa ating
hardin…ubod siya ng ganda at siya’y nakatingin sa akin. Siya ata ang Mahal na Birhen.” Pagkasabi niya iyon ay inilabas niya ang
kanyang rosaryo at agad na nagdasal.
Nagpahiwatig ang Birhen.
Naintindihan iyon ni Mariette at gusto niyang tugunan ang inbitasyon na
iyon. Gusto niyang lumabas pero
pinigilan siya ng kanyang ina sa takot na iyon ay isang multo kaya daglian
niyang isinara ang pinto. Dahil hindi
makalabas si Mariette ay bumalik siya sa bintana pero naglaho na ang Birhen.
IKALAWANG PAGPAPAKITA
Miyerkoles,
Enero 18, tatlong araw mula ng magpakita ang Birhen. Ang oras ay alas siyete ng gabi.
Lumabas si Mariette sa kanilang tahanan at lumuhod sa harap ng hardin
kung saan nagpakita ang Birhen. Habang
siya’y nagrorosaryo, bigla na namang nagpakita sa kanya ang Birhen. Kahit na nagulat, ipinagpatuloy pa rin niya
ang pagdarasal. Nang siya’y natapos sa
pagdarasal, nagpahiwatig ang Birhen na sundan siya. Sumunod siya at habang siya’y naglalakad, huminto siya, lumuhod
at nagdasal ng Ave Maria. Tumayo siya
at naglakad uli. Hindi pa siya
nakakalayo ay huminto siya sa ikalawang pagkakataon, lumuhod at saka nagdasal
uli. Tumayo siyang muli at sinundan ang
mga bakas ng Birhen. Nakarating sila sa
isang bukal. Lumuhod si Mariette habang
ang Birhen ay nakalutang sa gitna ng bukal.
Sabi ng Birhen sa kanya, “Ilagay mo ang iyong mga kamay sa tubig.” Sumunod siya ng walang pag-aalinlangan at
habang nasa tubig ang kanyang mga kamay ay nabitiwan niya ang kanyang
rosaryo. Nagsalita uli ang Birhen, “Ang
bukal na ito ay akin.” Pagkasabi niya
iyon ay nagpaalam siya kay Mariette at unti-unti siyang naglaho sa kanyang
paningin.
IKATLONG PAGPAPAKITA
Huebes, Enero
19, alas siyete ng gabi. Lumabas si
Mariette sa kanilang tahanan kasama ang kanyang tatay. Hindi pa sila nakakalayo ay tumigil si
Mariette at siya’y lumuhod. Hindi
nagtagal, tumambad na namang muli ang Birhen sa kanyang harapan. Itinaas niya ang kanyang mga kamay at
sinabing, “Andito na naman ang Mahal na Birhen. Tanong niya sa Birhen, “Sino po ba talaga kayo?” Sumagot ang Birhen, “Ako ang Ina ng ,mga
Dukha.” Pagkatapos, humakbang uli si Mariette
papunta sa bukal na hindi kinalilimutang lumuhod sa dati niyang luhuran. Pagdating nila sa bukal ay muli siyang
lumuhod at tinanong uli ang Birhen, “Mahal na Birhen, bakit po ninyo sinabing
sa inyo ang bukal na ito?” “ Ang bukal na ito ay para sa lahat…lalo na sa may
mga sakit.” Ang tugon ng Birhen. Bago uli siya naglaho, sinabi niya kay
Mariette, “Ipagdarasal kita,” at siya’y
tuluyan nang naglaho.
IKAAPAT NA PAGPAPAKITA
Biyernes, Enero
20, may sinat si Mariette pero hindi iyon naging hadlang para makapunta siya sa
kanilang hardin at magdasal. Sa hardin
siya ay nagrosaryo. Makalipas ang
dalawang minuto ay nagpakita na namang muli ang Birhen sa kanya. Nagtanong uli siya sa Birhen, “Ano po ang
gusto ninyo sa akin, Mahal na Birhen?”
“Gusto kong magpatayo ka ng munting kapilya sa lugar na ito.” Sagot ng
Birhen. Pagkatapos nito ay binasbasan
niya si Mariette at siya ay muling naglaho.
Mula Enero 21
hangang Pebrero 11, gabi-gabing nagdarasal si Mariette sa kanilang hardin. Kahit na ang malamig na panahon ay hindi
napigilan ang pagdarasal niya sa lugar na iyon. Sa mga araw na iyon, siya pa lang ang naniniwala sa Birhen.
IKALIMANG PAGPAPAKITA
Sabado, Pebrero
11, si Mariette ay nakaluhod uli sa hardin at nagdarasal. May mga konti nang tao ang nandoon. Pagkatapos ng ikalawang misteryo,
tumakbo siya papuntang bukal. Lumuhod
siya sa dati niyang luhuran, binasa ang kamay at nagkrus na nasa kanyang mga
kamay ang rosaryo. Sinabi sa kanya ng
Birhen, “Nandito ako para sugpuin ang kahirapan.” Saka naglaho siya gaya ng dati.
IKAANIM NA PAGPAPAKITA
Ang Birhen ay hindi nagpakita kay Mariette hangang Pebrero 15. Sa gabing ito ay muling nagpakita sa kanya ang Birhen. Nag-usap sila at sinabi ni Mariette sa Birhen, “Mahal na Birhen, humihingi po ng pari ang pagpapatunay na kayo nga ang Mahal na Birhen.” Sumagot ang Birhen, “ Maniwala ka sa akin, at akko’y maniniwala sa iyo.” Saka nagsabi siya kay Mariette ng isang sikreto. Bago siya naglaho, sabi niya kay Mariette, “Manalangin ka ng buong puso.” At muling nagpaalam ang birhen.
IKAPITONG PAGPAPAKITA
Lunes, Pebrero
20, umulan ng maraming yelo kaya napakalamig ng kapaligiran. Sa pagtatapos ng ikalawang misteryo ng
pagrorosaryo, nagpakita uli ang Birhen kay Mariette. Pumunta uli sila sa bukal.
Habang papunta ay lumuluhod pa rin siya sa dati niyang
pinagluluhuran. Sa bukal, ngumiti sa
kanya ang Birhen at sinabing, “Mahal kong anak, magdasal ka ng Taimtim.” At naglaho uli ang Birhen.
IKAWALONG PAGPAPAKITA
Huebes, Marso
2, malakas ang ulan. Sa pagsisimula ng
ikatlong misteryo ay tumigil ang ulan, nagliwanag ang kalangitan at kumislap
ang mga bituin. Si Mariette ay
nanatiling nagdarasal. At nagpakita ang
Birhen sa kanya ng ikawalo at huling pagkakataon. Sa tagpong ito, malungkot at hindi nakangiti ang Birhen. Sabi niya, “Ako ang Ina ng Tagapagligtas,
ang Ina ng Diyos.” At sabi niya na may
bahid na kalungkutan sa kanyang mukha, “Magdasal ka ng buong puso.” At siya’y naglaho na ng tuluyan.
NATATANGING PAGKILALA SA MGA PAGPAPAKITA
Dalawang beses ng kinilala ang mga pagpapakita na
ito, una noong 1942 at ikalawa noong 1947.
Pero ang mga pagkilala na ito ay may konting pag-aalinlingan. Ngayon, tayo ay walang dudang naniniwala sa katotohanan
na nagpakita ang Mahal na Birhen kay Mariette Beco ng walong beses – noong 15,
18, 19 at 20 ng Enero, 11, 15 at 20 ng Pebrero, at 2 ng Marso. (Pastoral
letter of Mgr. L. J. Kerkhofs, Bishop of Liege, 22nd August 1949)
NOBENA
SA MAHAL NA INA NG MGA DUKHA
+
Sa ngalan ng Ama, at ng Anak at ng Espiritu Santo.
(Himig: IMMACULATE MOTHER)
O Birhen ng Dukha
Ika’y papurihan
Ang nagsugo sa’yo
Purihin kailan man
Ave, Ave, Ave Maria.
Sa’yong pananalig
Sa ‘min, salamat po
Kami’y mananalig
Taos-puso sa’yo.
Ave,
Ave, Ave Maria
Ave, Ave, Ave Maria
Salamat sa lahat
Ng iyong ginawa
Sa gagawin mo pa,
O Birhen ng Dukha.
Ave, Ave, Ave Maria
Ave, Ave, Ave Maria
Lahat:
Mahal na Birhen ng mga Dukha, purihin ka magpakailanman! At Purihin din
ang nagsugo sa iyo sa amin! Dahil sa iyong pinagmulan, sa iyong ginawa ngayon
sa amin at sa gagawin pa sa haharapin, kami at lahat ng susunod sa amin, ay
nag-ukol sa iyo ng aming pananampalataya at panalangin. Ikaw ay aming takbuhan gaya ng ipinahayag mo
sa Banneux: Tagapamagitan ng lahat biyaya, Ina ng Mananakop, Ina ng Diyos,
Maawain at Makapangyarihang Ina ng nagmamahal sa mga maysakit, nagpapaginhawa
sa mga maysakit, nagpapaginhawa sa mga naghihirap, nagliligtas sa mga tao at
mga lipunan, Reyna at Ina ng lahat ng bansa, na naparito upang patnubayan ang
mga naaampon sa iyo upang ilapit kay Hesus ang tunay at kaisa-isang bukal ng
buhay na walang hanggan. Mahal na
Birhen ng mga Dukha, nananalig kami sa iyo, manalig ka rin sa amin.
Lahat:
Panginoon kong Hesukristo,
Dios na totoo at tao namang totoo, gumawa at sumakop sa akin, pinagsisihan kong
masakit sa tanang loob ko ang dilang pagkakasala ko sa iyo.
Ikaw nga ang Dios ko,
Panginoon ko at Ama ko, na iniibig ko nang higit sa lahat. Nagtitika akong matibay na di na muling magkakasala
sa iyo, at nagtitika naman akong magkumpisal ng dilang kasalanan ko.
Umaasa akong patatawarin mo
rin ako alang-alang sa iyong mahal na pasyon at pagkamatay sa krus dahilan sa
akin. Amen.
Namumuno.
ANG
MABUTING BALITA NG PANGINOON AYON KAY SAN JUAN
“Nguni’t
ang uminom ng tubig na ibibigay ko sa kanya ay hindi na muling mauuhaw. Ito’y magiging isang bukal sa loob niya,
babalong at magbibigay sa kanya ng buhay na walang hanggan.” ( Jn. 4:14)
MAGNILAY
Panalangin:
Mahal na Birhen ng mga Dukha, inaanyayahan mo akong
magtungo sa bukal na walang iba kundi si Cristo. Turuan mo akong sumunod nang mababa ang loob sa iyong anyaya at
tulungan akong tumanggap kay Cristo ng lakas na limutin ang aking sarili
alang-alang sa aking kapwa.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina,
isinasamo namin bigyan kami ng kapayapaan sa aming bayan.”
Panginoon, maawa ka sa Amin.
Kristo, maawa ka sa amin.
Panginoon, maawa ka sa amin.
Kristo, pakinggan mo kami.
Kristo, pakapakinggan mo kami.
Diyos Ama sa Langit, maawa ka sa amin.
Diyos Anak, na tumutubos sa sanlibutan. maawa
ka sa amin.
Diyos Espititu Santo, maawa ka sa amin.
Banal na Trinidad, iisang Diyos, maawa ka sa amin.
Santa Maria, ipinalangin
mo kami.
Santang Ina ng Diyos, ipinalangin mo kami.
Santang Birhen ng mga Birhen,
ipanalangin mo
kami.
Ina ni Kristo, ipanalangin
mo kami.
Inang
puspos ng biyaya ng Diyos, ipanalangin mo
kami.
Ina ng Mananakop, ipinalanagin mo kami.
Mahal na Birhen ng mga Dukha,
akayin kami
kay Jesus, bukal ng biyaya.
Mahal na Birhen ng mga Dukha,
iligtas ang lahat ng bansa.
Mahal na Birhen ng mga Dukha, lunasan ang mga maysakit.
Mahal na Birhen ng mga Dukha, tulungan ang mga naghihirap.
Mahal na Birhen ng mga Dukha, ipagdasal ang bawat isa sa amin.
Mahal na Birhen ng mga Dukha,
kami’y
sumasampalataya sa iyo.
Mahal na Birhen ng mga Dukha,
taimtim kaming
nagdarasal.
Mahal na Birhen ng mga Dukha,
pagpalain mo
kami.
Mahal na Birhen ng mga Dukha, Ina ng Mananakop, Ina ng Diyos, salamat sa iyo.
Mapagpagaling
sa mga maysakit, ipanalangin mo kami.
Tanggulan
ng mga makasalanan, ipanalangin mo kami.
Mapag-aliw
sa mga nagdadalamhati, ipanalangin mo
kami.
Mapag-ampon
sa mga Kristiyano, ipanalangin mo kami.
Kordero ng Diyos, ikaw ang nakawawala ng kasalanan
ng sanlibutan.
- Pakinggan mo
po kami.
Kordero ng Diyos, ikaw ang nakawawala ng kasalanan
ng sandaigdigan.
-
Pakapakinggan mo kami.
Kordero ng Diyos, ikaw ang nakawawala ng kasalanan
ng santinakpang langit.
-
Kaawaan mo po kami.
Lahat:
Mahal na birhen ng Banneux, Ina ng
Mananakop, Ina ng Diyos, Birhen ng mga Dukha, yayamang ipinangako mong
mananalig sa iyo. Ikaw ang aming
pag-asa. Buong awa mong dinggin ang aming
mga panalanging ayon sa iyong kalooban. Ito
ang mga sumusunod (Banggitin natin ang ating mga pagsamo)
Ipagkaloob mo sa makasalanan
ang iyong masaganang pananampalataya at sa mga dukha ang kanilang pagkain
araw-araw.
Lunasan mo sana ang mga maysakit, dulutan ng ginhawa ang mga
naghihirap, at ipanalangin ang kaharian ni Kristong Hari ay lumaganap sa lahat
ng bansa. Amen.
MARIA INA NG MGA DUKHA,
IPANALANGIN MO KAMI.
MARIA INA NG MGA DUKHA,
IPANALANGIN MO KAMI.
MARIA INA NG MGA DUKHA,
IPANALANGIN MO KAMI.
Namumuno.
ANG
MABUTING BALITA NG PANGINOON AYON KAY SAN JUAN
“Nguni’t
ang uminom ng tubig na ibibigay ko sa kanya ay hindi na muling mauuhaw. Ito’y magiging isang bukal sa loob niya,
babalong at magbibigay sa kanya ng buhay na walang hanggan.” ( Jn. 4:14)
MAGNILAY
Panalangin:
Mahal na Birhen ng mga Dukha, inaanyayahan mo akong
magtungo sa bukal na walang iba kundi si Cristo. Turuan mo akong sumunod nang mababa ang loob sa iyong anyaya at
tulungan akong tumanggap kay Cristo ng lakas na limutin ang aking sarili
alang-alang sa aking kapwa.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina,
isinasamo namin bigyan kami ng kapayapaan sa aming bayan.”
Namumuno.
ANG
MABUTING BALITA NG PANGINOON AYON KAY SAN MATEO
“Mapalad
ang mga aba na wala nang inaasahan kundi ang Diyos, sapagkat makakasama sila sa
kanyang kaharian.” ( Mt. 5:3)
MAGNILAY
Panalangin:
Ina ng Dios, minarapat mong taglayin ang pangalang
Birhen ng mga Dukha sa bayan ng Banneux.
Ilayo sa aking puso ang paghilig sa mga bagay na makalupa. Ipagkaloob ang lahat kong pangangailangan at
nawa’y mabatid ko na ang lahat ay nagmumula sa Dios. Turuan mo akong tanggaping
masaya ang lahat ng ipadala sa akin.
Nawa’y lumayo ako sa lahat ng makalalabag sa kanyang kalooban at dulutan
ako ng lahat ng makakalapit sa Kanya, aking Mananakop at Ama.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina,
isinasamo namin bigyan kami ng kapayapaan sa aming bayan.”
Namumuno.
ANG
MABUTING BALITA NG PANGINOON AYON KAY SAN MATEO
“Kayo’y
ilaw sa sanlibutan. Hindi maitatago ang
isang lunsod na nakatayo sa ibabaw ng burol..” ( Mt. 5:14)
MAGNILAY
Panalangin:
Mahal na Birhen ng mga Dukha, ang mensahe mo ay ukol
sa lahat ng bansa. Inaanyayahan mo ang
lahat ng bansa na magtungo sa iyong bukal na si Cristo, Mananakop at Pinuno ng
Sangkatauhan. Loobin mong ang lahat ay
magkaisa bilang mga kapatid sa Panginoon.
Nawa’y makita ko sa bawat isa at sa lahat ang larawan ng Dios na ating
Ama.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina, isinasamo namin bigyan kami ng kapayapaan sa aming
bayan.”
Namumuno.
ANG
MABUTING BALITA NG PANGINOON AYON KAY SAN MARCOS
“At
tinuruan niya ang mga tao, sinabi niya, ‘Nasusulat, ang aking bahay ay
tatawaging bahay dalanginan ng lahat ng bansa’ Ngunit ginawa niyang pugad ng
mga magnanakaw.”
(
Mk. 11:17)
MAGNILAY
Panalangin:
Mahal na Birhen ng mga Dukha, ipinahayag mo ang
hangaring magkaroon ng Kapilya upang ang Eukaristia, bukal ng lahat ng biyaya
ay parangalan. Tuluyan mo akong lumapit nang may pananampalataya at pag-ibig at
turuan akong ialay ang sarili sa Ama na kaisa ni Jesus sa ikapagiging banal ng
sanlibutan.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina,
isinasamo namin bigyan kami ng kapayapaan sa aming bayan.”
Namumuno.
ANG
MABUTING BALITA NG PANGINOON AYON KAY SAN MATEO
“Lumapit
kayo sa akin, kayong lahat na napapagal at nabibigatan sa inyong pasanin, at
kayo’y pagpapahingahan ko.” ( Mt. 11:28)
MAGNILAY
Panalangin:
Mahal na Birhen ng mga Dukha, ipinangako mo na
lulunasan mo ang mga nagdurusa.
Ipagkaloob mo sa akin ang lakas na mapagtiisan ang lahat ng hirap upang
maging lalong banal at ganap. Tanglawan
ang aking isip tungkol sa mahalaga at banal na bunga ng pagtitiis at turuan
akong maging maligaya sa gitna ng aking mga hirap. Tulungan akong lunasan ang hirap ng kapwa sa bisa ng ating
kagandahang loob at malasakit sa kapwa.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina,
isinasamo namin bigyan kami ng kapayapaan sa aming bayan.”
Namumuno.
ANG
MABUTING BALITA NG PANGINOON AYON KAY SAN JUAN
“Huwag
kayong mabalisa, manalig kayo sa Diyos at manalig din kayo sa akin.” ( Jn.
14:1)
MAGNILAY
Panalangin:
Mahal na Birhen ng mga Dukha, ipinahayag mo:
“Sumampalataya ka sa akin. ako’y sasampalataya sa iyo”. Kung matatag ang aking pananampalataya sa
salita ni Jesus, ang Panginoong Dios ay gagawa ng mga dakilang bagay sa
atin. Mahal na Ina, ipagkaloob mo sa
akin gayong matibay na pananampalataya.
Turuan akong laging maalala na ako’y nasa harap ng Dios sa lahat ng
pangyayari sa araw-araw at magdasal ng may matibay na pananalig.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina,
isinasamo namin bigyan kami ng kapayapaan sa aming bayan.”
Namumuno.
PAGBASA MULA SA SULAT NI
APOSTOL SAN PABLO SA MGA TAGA-EFESO
“Ang
lahat ng ito’y gawin ninyo sa pamamagitan ng bawa’t uri ng panalangin at
pagsamo. Manalangin kayo sa lahat ng
pagkakataon, sa patnubay ng Espiritu kaya’t lagi kayong maging handa, at
patuloy na manalangin para sa lahat ng hinirang ng Diyos.” ( Eph. 6:18 )
MAGNILAY
Panalangin:
Mahal na Birhen ng mga Dukha, makaitkatlo mo akong
pinapayuhan ng magdasal nang matagal.
Sa bayan ng Bannuex, marubdob mong itinuro na kung walang panalangin,
walang pamumuhay – Cristiano. Mahal na
Ina, turuan mo akong magdasal, manalanging may matatag na pananampalataya upang
palaganapin ang mga aral ng Ebanghelio.
Akayin mo ako na dumulog tuwina sa Eukaristia upang sa pamamagitan ng
Tinapay na makalangit ay magkaroon ako ng tapang at lakas na magbalik-
loob. Ako sana’y maging maawain at
mapagpaumanhin sa kapwa upang palaganapin ang kasiyahan sa paligid ko sa bisa
ng aking mga kawang-gawa.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina, isinasamo namin bigyan kami ng kapayapaan sa aming
bayan.”
Namumuno.
ANG MABUTING BALITA NG
PANGINOON AYON KAY SAN MATEO
“Maglilihi
ang isang dalaga at manganganak ng isang lalaki, at tatawagin itong Emmanuel.”
( Mt. 1:23 )
MAGNILAY
Panalangin:
Mahal na Birhen ng mga Dukha, nagpakita ka sa pook
ng Banneux, sa taguring “Ina ng Mananakop, Ina ng Dios”. Bilang Ina ng Mananakop, naparito ka upang
lunasan ang aming mga hirap. Tulungan
mo kaming maunawaan na si Jesus ay ang pag-ibig, at kami naman ay dapat
magmahalan. Bilang Ina ng Dios, nawa’y
tumimong mabuti sa amin ang iyong kapangyarihan at sikap. Inang kaibig-ibig, maniwala ka sa amin,
kami’y maniniwala sa iyo.
Dasalin ang
isang dekada ng Rosario (1 Ama Namin, 10 Aba Ginoong Maria, 1 Luwalhati )
Lahat:
“Mahal na Ina,
isinasamo namin bigyan kami ng kapayapaan sa aming bayan.”
Dasalin
ang Litanya at huling panalangin
PANGWAKAS
NA AWIT
Mother of Christ, Mother of
Christ,
What shall I ask of thee?
I do not sigh for the wealth
of earth
For the joys that fade and
flee;
But Mother of Christ, Mother
of Christ,
This do I long to see,
The bliss untold which thine
arms enfold,
The treasure upon thy knee.
Mother of Christ, Mother of
Christ,
I toss on a stormy sea,
Oh, lift thy Child as a
Beacon-light,
To the place where I fain
would be,
And Mother of Christ, Mother
of Christ,
This do I ask of Thee –
When the voyage is o’er,
O, stand on the shore,
And show Him at last to me.
ABOUT OUR PARISH
PARISH VISION, MISSION, AND
GOALS
DEVOTION TO OUR LADY OF THE
POOR
About the Parish | Bibliarazal | Parish Bulletin | Feedback | Email Us | Useful Links
Copyright (c) 2002 Our Lady
of the Poor Parish
F.B. Tenement, Sampaguita
St.,
Western Bicutan, Taguig,
Philippines
olpparish@hotmail.com | https://olpparish.tripod.com/